VARK VAN ‘N ANDER KLEUR

Hiënas wat hulle soos varke gedra, ken die Van Deventers uit eie skande en skade. Hulle is een van die handelsmerke van Sabiepark in die bos.

Met varke wat hulle soos hiënas gedra, was ons onvertroud. Tot vandeesweek in die pragtige nasionale Wildernispark in die Tuinroete.

Toe ons een oggend wakker word, staan nie een vullisdrom regop nie. Die onbehaaglike inhoud lê verstrooi van hut tot hut.

Nou wat de drommel?

Die geheim is gou deur een van die park se manne opgeklaar. Die bosvarke was op hul periodieke strooptogte – drie nagte in ‘n ry. Die bene van ‘n T-been-steak is klaarblyklik onweerstaanbaar.

Bosvarke! As dit hiënas was, sou jy die verskil in die resultaat nie juis kon raaksien nie.

Tokkie wat die derde nag om 03:30 een in die lig van haar flits goed bekyk het, rapporteer egter dat ‘n bosvark ongetwyfeld mooier is as ‘n hiena, en ook strate mooier as ‘n vlakvark, veral weens sy digte pels.