Pittig soos ‘n papaja (1)

‘n Vriendin ondergaan ‘n operasie wat nie in mansgeselskap in besonderhede beskryf word nie. Waarop dit neerkom, is dat sekere hegtings in sekere sensitiewe areas nodig raak om ‘n ineenstorting te verhoed – as u weet wat ek bedoel.

Vriendin nommer twee kan nogal met pittighede vorendag kom sonder om hard te probeer. Sy beluister ‘n beskrywing van die verrigtinge in die hospitaal se teater aandagtig. Finale stap, verneem sy, was die aanbring van so ‘n soort net-affere wat moet help binne hou wat binne hoort.

“O,” laat waai sy, “dan het hulle vir jou ‘n Trellidor ingesit!”